विद्यार्थ्यांच्या शैक्षणिक हक्कांच्या संरक्षणासाठी आणि पारदर्शक परीक्षा व्यवस्थेच्या मागणीसाठी शिक्षणतज्ज्ञ सोनम वांगचुक यांनी सुरू केलेल्या आंदोलनाला पाठिंबा व्यक्त करण्यासाठी भांबोरा येथे शुक्रवारी (दि. १७ जुलै) एकदिवसीय लाक्षणिक उपोषण आयोजित करण्यात आले आहे. हे उपोषण ग्रामपंचायत कार्यालयासमोर सकाळी १० ते सायंकाळी ५ या वेळेत होणार आहे.
लडाखमधील SECMOL संस्थेचे संस्थापक, शिक्षणतज्ज्ञ व पर्यावरणप्रेमी सोनम वांगचुक यांनी NEET, TET आदी परीक्षांमधील कथित गैरप्रकारांची चौकशी, तसेच विद्यार्थ्यांना दर्जेदार आणि हक्काचे शिक्षण मिळावे, या मागण्यांसाठी दिल्ली येथे आंदोलन सुरू केले आहे.
या आंदोलनाशी ऐक्य दर्शविण्यासाठी भांबोरा येथील शिक्षणप्रेमी नागरिक, पालक, विद्यार्थी आणि सामाजिक कार्यकर्त्यांनी लाक्षणिक उपोषणात सहभागी व्हावे, असे आवाहन आयोजकांनी केले आहे.
“मुलांचे भविष्य, देशाचे भविष्य” या घोषवाक्याखाली होणाऱ्या या उपोषणातून पारदर्शक परीक्षा पद्धती, गुणवत्तापूर्ण शिक्षण आणि विद्यार्थ्यांच्या शैक्षणिक हक्कांचे संरक्षण या मागण्यांवर भर देण्यात येणार आहे. या उपक्रमामुळे परिसरातील विद्यार्थी, पालक आणि नागरिकांचे लक्ष वेधले गेले असून उपोषणाबाबत उत्सुकता निर्माण झाली आहे.