कर्जत तालुक्यातील कोंभळी- खांडवी एमआयडीसीला काही शेतकऱ्यांनी प्रखर विरोध केला आहे. आमच्या शेतजमिनीच्या उताऱ्यावर शासनाने चुकीच्या पद्धतीने नोंद लावली असल्याने शेतजमीन बचाव कृती समितीच्यावतीने मंगळवारी निषेध करण्यात आला. यावेळी लोकप्रतिनिधी यांच्यासह तालुका प्रशासनाच्या विरोधात तीव्र प्रतिक्रिया देत रोष व्यक्त करण्यात आला.
कर्जत- जामखेड मतदारसंघातील एमआयडीसीसाठी तालुक्यातील कोंभळी परिसरातील जमिनीचे अधिग्रहण प्रक्रिया प्रशासनाकडून सुरू झाली आहे. मंगळवार, दि. १ मार्च रोजी खांडवी परिसरातील शेतकऱ्यांनी महिलांसह आंदोलन करत शेतजमीनीच्या उताऱ्यावर विक्री करण्यास मनाई केल्याची नोंद लावल्याने निषेध व्यक्त केला. यावेळी रद्द करा, रद्द करा एमआयडीसी रद्द करा ! आमच्या काळ्या आईचा सौदा रद्द करा, सुपीक जमिनीतून एमआयडीसी हद्दपार करा यासह बेकायदेशीर एमआयडीसीला १०० टक्के विरोध अशा घोषणा देत राज्यसरकारसह तालुका प्रशासनाच्या विरोधात घोषणाबाजी करण्यात आली.
काबाडकष्ट करून जमीन घेतली. वडिलोपार्जित जमीन कसताना हाल अपेष्टा सहन करून कुटुंबाचा उदरनिर्वाह करत असलेली जमीनच शासन आता आपल्या नावावर करीत असल्याने मरणाशिवाय पुढे पर्याय नाही, असे म्हणत शेतकऱ्यांनी एमआयडीसी रद्द न झाल्यास आत्मदहन करण्याचा इशारा दिला आहे.
यामध्ये सुमन तापकीर, लता तापकीर, वैशाली तापकीर, शीतल तापकीर, संगीता तापकीर, वंदना तापकीर, प्रमोद तापकीर, प्रदीप तापकीर, मिनीनाथ तापकीर, सुरेखा तापकीर, भारती गांगर्डे, मीरा तापकीर, नीता तापकीर, सविता तापकीर, मनीषा तापकीर, अश्विनी तापकीर, राणी तापकीर, नंदा वायसे, अमित शेलार, भाऊसाहेब गोरखे, ऋषी गोरखे आणि पिंटू उदमले व आदींनी सहभाग घेतला.
