प्रा. राम शिंदे हे नाव महाराष्ट्राच्या राजकारणात प्रामाणिकता, साधेपणा आणि विकासशील नेतृत्वाचे प्रतीक आहे. ग्रामीण भागात जन्माला आलेल्या या नेतृत्वाने आपल्या कर्तृत्वाने राज्याच्या राजकारणात विशेष स्थान निर्माण केले. त्यांच्या विधान परिषदेच्या सभापतीपदी होत असलेल्या निवडीने केवळ त्यांचे राजकीय कर्तृत्वच सिद्ध केले नाही, तर त्यांच्या नेतृत्वगुणांना एक नवी ओळख दिली आहे.
जामखेड तालुक्यातील शेतकरी कुटुंबात वाढलेल्या प्रा. राम शिंदे यांनी शिक्षण पूर्ण झाल्यानंतर प्राध्यापक म्हणून काम केले. पण समाजाच्या व्यापक विकासासाठी काहीतरी करण्याच्या इच्छेने त्यांना राजकारणाकडे वळायला भाग पाडले. प्रा. राम शिंदे यांनी आपल्या राजकीय प्रवासाची सुरुवात भारतीय जनता पक्षाच्या कार्यकर्त्यापासून केली. सुरुवातीच्या काळात त्यांनी जामखेड तालुक्यातील राजकारणात आपला ठसा उमटवला. पक्षाच्या तळागाळापासून काम करत त्यांनी पक्ष नेतृत्वाचा विश्वास संपादन केला. २००९ साली त्यांना कर्जत- जामखेड मतदारसंघातून विधानसभेची निवडणूक लढवण्यासाठी तिकीट देण्यात आले आणि त्यांनी मोठ्या मताधिक्याने विजय मिळवला. त्यांनी आपल्या पहिल्या कार्यकाळात मतदारसंघातील पायाभूत सुविधा, पाणीटंचाई आणि शिक्षण यासारख्या मुद्द्यांवर काम करून जनतेचा विश्वास संपादन केला.
२०१४ च्या निवडणुकीत त्यांनी पुन्हा विजय मिळवला आणि महाराष्ट्र सरकारमध्ये जलसंधारण मंत्री म्हणून जबाबदारी स्वीकारली. त्यांच्या मंत्रीपदाच्या कार्यकाळात ‘जलयुक्त शिवार’ ही योजना प्रभावीपणे राबवण्यात आली, जी राज्यातील पाणीटंचाई दूर करण्यासाठी महत्त्वपूर्ण ठरली. त्यांनी फक्त एकाच खात्यापुरते मर्यादित न राहता, जलसंधारणासोबतच इतर खात्यांची जबाबदारीही यशस्वीरीत्या सांभाळली.
गृह, वस्त्रोद्योग, सामाजिक न्याय, पर्यटन, राजशिष्टाचार अशा विविध खात्यांमधून त्यांनी लोकहिताच्या अनेक योजनांची अंमलबजावणी केली. त्यांच्या मंत्रीपदाच्या कार्यकाळात राज्यातील ग्रामीण भागातील विकासावर विशेष भर देण्यात आला.
२०१९ मध्ये राष्ट्रवादी काँग्रेसचे रोहित पवार यांनी कर्जत- जामखेड मतदारसंघातून त्यांचा पराभव केला. हा पराभव त्यांच्यासाठी मोठा धक्का होता. मात्र, त्यानंतरही प्रा. राम शिंदे यांनी राजकीय मैदान सोडले नाही. त्यांनी पक्ष संघटनेत आपली ताकद दिली आणि राज्यभर कार्यकर्त्यांसोबत संपर्क साधत पक्षाचे जाळे मजबूत केले. २०२२ मध्ये भाजपने त्यांना विधान परिषदेच्या सदस्यपदासाठी उमेदवारी दिली आणि त्यांना पुन्हा एकदा विधानमंडळात संधी मिळाली. आ. राम शिंदे यांची आताच विधान परिषदेच्या सभापतीपदी निवड झाली. त्यांच्या नेतृत्वाखाली विधान परिषदेचे कामकाज अधिक शिस्तबद्ध आणि समर्पक होईल, असा विश्वास पक्षाला आहे. त्यांच्या दीर्घ राजकीय अनुभवाचा उपयोग विधान परिषदेच्या सक्षमीकरणासाठी होईल, अशी अपेक्षा आहे.
प्रा. राम शिंदे यांच्या कारकिर्दीचा प्रवास हा मेहनत, निष्ठा आणि ध्येयाची जाणीव यांचा सुंदर संगम आहे. त्यांच्या नेतृत्वामुळे कर्जत- जामखेडसारखा मागासलेला मतदारसंघ आज राज्याच्या नकाशावर अधोरेखित झाला आहे. त्यांची कारकीर्द हे सिद्ध करते की, योग्य दिशेने केलेली मेहनत, पक्षाशी एकनिष्ठता आणि सामान्य जनतेशी असलेली बांधिलकी माणसाला राजकारणात अढळ स्थान मिळवून देते. प्रा. राम शिंदे आज केवळ एक नेते नाहीत, तर लोकांसाठी प्रेरणास्थान बनले आहेत. त्यांचे साधे राहणीमान, सर्वसामान्य जनतेशी संवाद साधण्याची हातोटी, आणि विकासात्मक दृष्टिकोन यामुळे ते महाराष्ट्राच्या राजकारणात कायमच स्मरणीय राहतील.
